ज्योतिष गल्ली – जहाँ हत्केलामा भाग्य खोजिन्छ !

विज्ञानलाई चकित बनाउने गरी पशुपतिको सेरोफेरोमा एउटा गल्लीको नामाकरण गरिएको देखिन्छ । पशुपति मूल मन्दिरको गेटबाट केही पश्चिमतर्फ पाइला सारेपछि भेटिन्छ, यो गल्ली । जहाँ ज्योतिषीहरू पाइलैपिच्छे ठोकिन्छन् । किनकि, गल्लीको नामै छ– ज्योतिष गल्ली । ज्योतिष गल्लीमा करिब ५० भन्दा बढी ज्योतिषी भाग्यको परीक्षा केन्द्र खोलेर बसेका छन् । जहाँ भाग्य जाँच्न आउनेहरू प्रशस्त भेटिन्छन् । फेल भने कोही हुँदैनन् ! त्यसको एउटै कारण छ, ती परीक्षार्थीलाई पास गराएपछि मात्र त्यहाँका ज्योतिषीको घरमा चुलो बल्छ ।

                                                                                                              युवा ज्योतिषी भानु अर्याल

ठूला–ठूला साइन बोर्डमा लेखिएको हुन्छ, ‘यहाँ कम्प्युटरबाट हात हेरिन्छ’, ‘तन्त्रमन्त्रद्वारा झारफुक गरिन्छ’ । साइनबोर्डहरू दिनभरि ग्राहक कुरेर बस्छन् । ती साइनबोर्ड हेरेर भित्र पसेका मानिस भाग्यको परीक्षामा विशिष्ट श्रेणी हात पारेपछि मख्ख पर्दै बाहिर निस्किन्छन् । तर, भोलिपल्टबाट उनीहरूको थाप्लोमा नियतिको उही नाम्लो अडिन्छ ।

यहीँ भेटिए, रामेछापमा अर्जुन खत्री । उनी ज्योतिषीका कुराले मख्ख थिए । उनलाई भनिँदै थियो, ‘तपाईंलाई शनि ग्रहले दुःख दिइरहेको छ, शनिबार–शनिबार माहांकाल जानुस्’ ‘कालो कपडाको टुक्रा भए पनि लगाइराख्नुस्’, ‘अबको पाँच वर्षभित्र तपाईंले ठूलो सफलता प्राप्त गर्नुहुनेछ’ आदि–इत्यादि ।

ज्योतिषीले भाग्य हेरिसकेपछि उनी बाहिर निस्के । निकै खुसी देखिन्थे । ज्योतिषीकहाँ भाग्य हेराउन आउनुको कारण सोध्दा थाहा भयो, उनी मलेसिया र कतार गरी दुईपटक विदेश गइसकेका रहेछन् । तर, दुवै ठाउँमा कम्पनी नराम्रो परेका कारण समयभन्दा अघि नै फर्किएछन् । अहिले फेरि कुवेत जान खोजिरहेका उनले भने, ‘धेरै दुःख पाएँ । जति मिहिनेत गरे पनि केही फल हात लागेन, अनि यता आएको ।’

चार सय ५० रुपैयाँ तिरेपछि अर्जुनको भाग्य खुल्यो । ज्योतिषीको ‘तीन महिनाभित्र वैदेशिक यात्राको योग छ’ भन्ने वाक्य उनका लागि लड्डु बनिदिएको थियो । उक्त लड्डु चपाउँदै उनी खुसी भएर काँडाघारीको आफ्नो कोठातिर लागे ।
०००
पशुपति मात्र होइन, रत्नपार्कको फुटपाथमा पनि प्रशस्तै भेटिन्छन्, भाग्य हेर्ने पसलेहरू । शून्य लगानीमा अधिकतम नाफा कमाउन खोलिएका ती पसलको व्यापार पनि उस्तै छ, नाफामै चलेका छन् । उनीहरू अरूको भाग्य त हेर्छन्, तर आफ्नै भाग्य हेर्न भने सकेका छैनन् । त्यसैले त चन्दन–टीका लगाएर हस्तविज्ञानको किताब अगाडि राखेर ग्राहकको मुख ताक्दै सोझा ग्राहकमा आफ्नो भाग्य खोजिरहेका छन् ।

ग्राहकको पनि घुइँचो हुन्छ । ५० रुपैयाँदेखि एक हजारसम्ममा शुभ साइत, जागिरको समयको ज्ञान किन्छन्, ग्रहदशा हटाउँछन् । यसरी भाग्यको भव्य व्यापार चलिरहन्छ । ज्योतिषीहरू मानिसको भावनालाई मैदान बनाएर भाग्य नामको ‘फुटबल’ खेलिरहन्छन् । मानिसहरू पनि स्वेच्छाले खेल्न दिइरहन्छन् ।

पशुपतिमा पसल थापेर बसेका एक ज्योतिषीले भने, ‘अनुसन्धानमूलक काम गर्नेलाई राज्यले अवहेलना गर्छ । हामीले बिहान–बेलुका खानका लागि सोच्नुपर्छ ।’ त्यो बाध्यता एउटा पाटो होला, तर त्यसै भनेर मानिसको अनुभूतिमाथि खेल्नु ठूलो जोखिम भएको युवा ज्योतिषी भानु अर्याल बताउँछन् ।

कतिपय अवस्थामा त ज्योतिषीले हात हेराउने निहुँमा यौनहिंसा गरेका खबर पनि बाहिर आउने गरेका छन् । अनुभूतिसँग मात्रै नभएर त्यसरी अन्य हर्कत गर्नेहरूका कारण ज्योतिष विज्ञानलाई हेर्ने मानिसहरूको दृष्टिकोण पनि गलत भएको पाइन्छ । पशुपतिको ज्योतिष गल्लीमै पशुपति मन्दिरतिर हिँडेका केही युवायुवतीको समूहमा कसैले बोलेको सुनियो, ‘अरूको भाग्य हेर्नेले आफ्नो भाग्यचाहिँ हेर्न सक्दैन’ अनि सबैजना गलल हाँस्दै अगाडि बढे । फेरि कसैले थपेको सुनियो, ‘भाग्य त हात नहुनेको पनि हुन्छ ।’

हरेक कुरा सिस्टममा चल्छ । यो प्रकृतिको नियम हो । पृथ्वी र ग्रहहरू जसरी चल्छन्, दिनचर्या पनि त्यसरी नै चल्नुपर्छ । तर, प्रकृतिभन्दा अघि जान खोजेकै कारण ज्योतिष विज्ञान हात हेर्नमा मात्र सीमित भएको हो । ज्योतिष विज्ञानले हामीलाई छाता ओढाइदिन सक्छ, तर पानी रोकिदिन सक्दैन ।

०००
पशुपतिको ज्योतिष गल्लीका पसलमा शिवजीको फोटो प्रायः सबैले राखेका छन् । उनीहरू ज्योतिषशास्त्रलाई धर्मसँग जोडिदिन्छन् । यो उपायले विशेष गरी धार्मिक महिलालाई राम्रोसँग आकर्षित गरिरहेको छ । उनीहरू सन्तान किन भएन या भयो भने कहिले हुन्छ, श्रीमान्को परस्त्रीसँग सम्बन्ध छ कि छैन भनेर ज्योतिषीसम्म पुग्छन् । त्यही मौकामा ज्योतिषीको हातमा भाग्य फुल्छ ।

धर्मसँग ज्योतिष विज्ञानको कुनै सम्बन्ध नभएको तर्क गर्छन्, युवा ज्योतिषी भानु अर्याल । भन्छन्, ‘यो संसारमा ‘सुप्रिम इनर्जी’ छ । त्यो इनर्जीले ब्रह्माण्डमा कसरी काम गर्छ भन्ने कुराको खोज ज्योतिष विज्ञानले गर्छ । यसको धर्मसँग कुनै सम्बन्ध छैन ।’ धर्म भनेको वैज्ञानिक प्रमाणलाई धारण गरेर आफूलाई सहज बनाउने माध्यम मात्र हो भन्ने उनको मान्यता छ ।

मानिसहरू सुखका वेला ज्योतिषीलाई बिर्सिन्छन् । जब दुःख पर्छ, अनि चिना बोकेर ज्योतिषीकहाँ पुग्छन् । यस्तैमा एक जना ३५/४० वर्षकी महिला भेटिइन्, ज्योतिष गल्लीमा । श्रीमान्को र आफ्नो चिना बोकेर आएकी उनी जान्न चाहन्थिन् कि श्रीमान्ले अचेल उनलाई किन माया गर्दैनन् ? उनको सबै समस्या थाहा पाएपछि र सात सय रुपैयाँ ‘भेटी’ राखेपछि ती ज्योतिषीले सोमबार महादेवको व्रत बस्न सुझाए । आफूसँग एउटा बुटी भएको र त्यसले श्रीमान्लाई परस्त्रीसँग विकर्षण गराउने, तर त्यसको लागि छुट्टै रुपैयाँ तिर्नुपर्ने बताए । ती महिला उनको कुरामा राजी भइन् ।

जब मानिसलाई दुःख, समस्या, बाधा–अड्चन आइलाग्छ, तब त्यस्ता ज्योतिषीको भाग्य उघ्रिन्छ । उनीहरूका लागि मान्छेका यस्ता समस्या सबैभन्दा उर्वर भूमि बन्छन् । तर, ज्योतिष विज्ञान हो भन्ने कुरा पशुपतिको ज्योतिष गल्लीमा मानिसको भावनालाई बन्दी बनाउन सिपालु ज्योतिषीलाई थाहा नभएको तर्क गर्छन्, युवा ज्योतिषी भानु अर्याल । ‘चराचर जगत्मा भएका ग्रहहरू, हामी जन्मिदाको वेलाको प्रभाव र अवचेतन मस्तिष्कको शक्तिको खोजी नै ज्योतिष विज्ञान हो’ भन्ने उनको तर्क छ ।
०००
पशिुपतिको ज्योतिष गल्लीमा एउटा भाग्य, ग्रहदशा, चिना हेराउने ठाउँ छ । शिवजी, बुद्ध तथा विभिन्न देवताका तस्बिरहरू छन् । त्यहाँ नामको पछाडि श्रीः महाराज राखेका ज्योतिषी बस्छन् । उनका लागि जमिनको सतहभन्दा करिब साढे दुई फिट उचाइमा आसन बनाइएको छ ।

उनले ध्यान गरिरहेका केही तस्बिर भित्तामा झुन्डिएका छन् । भिजिटिङ कार्ड बनाएका छन् । जहाँ लेखिएको छ, ‘जन्मकुण्डली, हस्तरेखा, अंक विज्ञान र तन्त्रको माध्यमबाट फलादेश गरिन्छ ।’ उनका अनुसार आममानिसदेखि ठूला–ठूला नेता पनि चुनावताका ‘चुनाव जित्छु कि जित्दिनँ’ भनेर उनकोमा पुगेका छन् । अघिल्लो वर्ष एकजना नेता पार्टीको चुनावमा ‘केन्द्रीय सदस्य जित्ने योग छ कि छैन’ भनेर आएको उनी सम्झिन्छन् ।

पूर्वप्रधानमन्त्री माधव नेपालसम्मको ग्रह दशा हेरेकोे दाबी छ, उनको । आफूले बिसौँ वर्षदेखि ज्योतिष विज्ञानको अध्ययन गरिरहेको बताउँदै उनले भने, ‘हाम्रोमा ग्राहक नै त्यस्तै आउँछन् । रिसर्च गर्ने समय पनि हुन्न । तर, समय मिलेसम्म गरिरहेको छु ।’

पातालभन्दा माथिका सम्पूर्ण कुरा ज्योतिष विज्ञानको अध्ययन क्षेत्र रहेको, तर ज्योतिषीहरू हात हेर्नमा मात्र सीमित हुनु दुःखलाग्दो कुरा भएको ज्योतिषी अर्याल बताउँछन् । ज्योतिष विज्ञानमा २७ वटा नक्षत्र हुने र ती नक्षत्रले पृथ्वीलाई सन्तुलनमा राख्ने हुनाले ज्योतिष विज्ञानको पहिले सर्त भनेको नक्षत्र अध्ययन गर्नु भएको तर्क भानुको छ । उनले भने, ‘आद्र्रा नक्षत्रमा सूर्यले स्पर्श गर्छ र असार महिनामा पानी पर्छ । तर, पुस, माघमा भने आद्र्रा नक्षत्र टाढा हुन्छ ।

अहिले अस्ट्रेलियामा जाडो छ । बिहानको २/३ बजे यता जति चिसो महसुस हुन्छ, त्यहाँको औसत तापक्रम त्यही हो ।’ ज्योतिष विज्ञानले ब्रह्माण्डको रहस्य, जन्मको प्रभाव र सर्वोच्च शक्तिको अध्ययन गर्ने भएकोले कर्मकाण्ड होइन, त्यता लाग्नुपर्छ भन्छन्, उनी । उनले भने, ‘ज्योतिषीको काम कर्मकाण्ड होइन, त्यो काम त पुरेतको हो ।’

०००
कुरै गर्ने हो भने पत्रिकाका अधिकांश पाठकले राशिफल हेरेरै दिनको सुरुवात गर्छन् । तर, ज्योतिष विज्ञानबारे भारतीय खगोलशास्त्री रविन चौधरीको भनाइ फरक छ । भन्छन्, ‘ज्योतिष विज्ञान केही होइन, हाम्रो कमजोरीको नक्सा हो ।’ यसको प्रमुख दोष नै ती ज्योतिषीलाई दिन्छन्, भानु अर्याल ।

जसले कमाउ धन्दाबाहेक अरू केही बनाएनन्, ज्योतिष विज्ञानलाई । भानुका अनुसार अँध्यारो शक्ति हो, तर पुरेतहरूले त्यसलाई देवी कालीसँग जोडिदिए र पूजा गर्न थालियो, खोज गरिएन । यसरी ज्योतिष विज्ञानसँग धर्म मिसिन आइदिनु हामी पछाडि पर्नुको कारण भएको उनको भनाइ छ । आविष्कार भन्ने कुरा भएन । सभ्यता अगाडि बढेन, बरु खुम्चिँदै गयो ।

इस्वी संवत् छैटौँ शताब्दीका एक ज्योतिषशास्त्री बराह मिहिरले भनेका छन्, ‘मान्छेले दुःखबाट पार पाउने ज्योतिषशास्त्र जस्तो अर्को डुंगा छैन ।’ ज्योतिष विज्ञान अध्यात्मसँग पनि जोडिएको विज्ञान हो । तर, ‘इनर ट्राभल’ (भित्री यात्रा)का सवालमा टिबेटियन अगाडि रहेको तर्क गर्छन्, भानु ।

हरेक कुरा सिस्टममा चल्छ । यो प्रकृतिको नियम हो । पृथ्वी र ग्रहहरू जसरी चल्छन्, दिनचर्या पनि त्यसरी नै चल्नुपर्छ । तर, प्रकृतिभन्दा अगाडि जान खोजेकै कारण ज्योतिष विज्ञान हात हेर्नमा मात्र सीमित भएको उनी बताउँछन् । भन्छन्, ‘ज्योतिष विज्ञानले हामीलाई छाता ओढाइदिन सक्छ, तर पानी रोकिदिन सक्दैन ।’

#ज्योतिष गल्ली

source – naya patrika

 

यसमा तपाइको मत

विज्ञान/प्रविधि बाट अन्य

घटनाभन्दा माथि विचारको तहमा बहस गर्न सक्ने नेपाली कांग्रेसभित्रका उम्दा बौद्धिक चक्र बास्तोला

शंकर तिवारी भनिन्छ, अग्लो वृक्ष ढलेपछि त्यसको उँचाइ मापन सहज हुन्छ । लोकतान्त्रिक आन्दोलनका योद्धा एवम् नेपाली कांग्रेसका नेता चक्रप्रसाद बास्तोलाको निधनपश्चात् उनको उँचाइको चर्चा शुरू भएको छ । झापाको जमीनदार परिवारमा जन्मेका बास्तोलाले दार्जीलिङको कन्भेन्ट स्कूलबाट विद्यालय...

जानिराखौ, यी हुन् पुरुषले ३० कट्नु अघि छोड्नुपर्ने १० बानी

एजेन्सी। प्रत्येक उमेर अनुसार मानिसहरुले गर्ने कार्य पनि फरक फरक हुन्छन् । जस्तै- बच्चामा दुध पिउनु भने उमेरमा वियर। सबै मानिसका लागि उमेरले परिपक्व पनि गराउछ। सबैले सिक्नु पर्ने कुरा चाहि प्रत्येक बर्ष बढेसँगै...

महिलामाथि हुने हिंसाको प्रमुख कारण बारे मुख खोले डा. बाबुराम भट्टराईले

महिलालाई हेर्ने दृष्टिकोण र महिलाको सामाजिक भूमिकालाई ठीक ढंगले परिभाषित गर्ने पाटोमा रहेको त्रुटि नै मुख्य रूपमा महिलामाथि हुने हिंसाको प्रमुख कारण हो केही समययता नेपालमा महिला हिंसाका घटना बढिरहेका छन्, यो अत्यन्तै चिन्ताको विषय...

वास्तु शास्त्र अनुसार यी स्थानमा राख्नु होस् धन : धन दोब्बर हैन तेब्बर पनि हुन सक्छ !

एजेन्सी । वस्तु शास्त्रमा ,आफूले मेहेनत गरेर कमाएको पैसा घरमा कस्तो ठाउँमा राख्दा उत्तम हुन्छ भन्ने कुरालाई महत्वका साथ बताइएको छ । घरको कुन दिशामा पैसा राख्दा लक्ष्मीले संधैब वास गर्छिन भन्ने कुरा स्पष्ट रुपमा...

कुन समयमा यौन सम्पर्क गर्दा गर्भ रहदैन? कुन समयमा रहन्छ – जानी राखौं

गर्भ रहन धेरै कुराको तालमेल मिल्नुपर्छ । कतिपय स्थितिमा पहिलो वा एक पटक मात्र यौनसम्पर्कमा नै गर्भ रहन्छ,तर सधैँ यस्तो हुँदैन ।यौनसम्पर्कका बेला पुरुषको वीर्यस्लखलन हुँदा निस्किएका करोडौं शुक्रकीटमध्ये केही पाठेघरको मुख हुँदै पाठेघर...

अझै पनि डोम समुदायलाई होटलको भाँडामा खान दिइँदैन

गौशाला ३, भदौ । मनरासिस्वा नगरपालिकामा अझै पनि डोम समुदायलाई होटलको भाँडामा खान नदिने गरिएको पाइएको छ । उक्त नगरपालिका–१ मनरा बस्ने प्रगास डोमले आफूहरूलाई यहाँका कुनै पनि होटलमा बस्न र त्यहाँको भाँडाकुडामा खानेकुरा खान...

शुक्रबारको दिन धनकी देवी लक्ष्मीलाई खुशी तुल्याउने, यी कुरा पढ्नुहोस्

काठमाडौँ : लक्ष्मीलाई धनकी देवी भनिन्छ । लक्ष्मीको पुजा गरे धनी भइने जनविश्वास रहेको छ । यहाँ लक्ष्मीलाई खुसी तुल्याउने केही तरिका प्रस्तुत गरिएको छ ।घरमा कुवेरको मुर्ति राख्दा लक्ष्मी खुसी हुने विश्वास गरिन्छ...

पुरुषका यी ७ कुरा हरेक युवतीलाई असाध्यै मन पर्छ – त्यसैले पुरुषहरु सबैले जानी राखौ

कुनै पनि केटीलाई आफूतर्फ आकर्षित गर्न सक्नु केटाको कला हो । सबैसँग यस्तो कला हूँदैन । तर कुनै पनि स्त्रीलाई आकर्षित गर्न कुनै विशेष शुत्र नै भने हुँदैन । केटामा केही गुण हुनु पर्छ...

नियमित सेक्स किन आवश्यक छ ? जान्नुहोस्

एजेन्सी । तपाईले विभिन्न समयमा सुुन्दै आउनुभएको होला की नियमित यौनसम्पर्कले स्वास्थ्यमा फाइदा गर्छ भनेर । त्यो सत्य पनि हो । तर नियमित यौनसम्पर्क नगरे चाहीँ के हुन्छ । यौन विशेषज्ञहरुका अनुसार नियमित यौनसम्पर्क...

चर्चित ज्योतिषद्वारा तयार पारीएको आजको राशिफल / वि.सं. २०७५ श्रावण २५ गते शुक्रबार

आज मिति वि.सं. २०७५ श्रावण २५ गते शुक्रबार तदनुसार ई. सं. २०१८ अगस्ट १० तारिख, विरोधकृत् नामक संवत्सर, शाके :– १९४०, सूर्य दक्षिणायन, वर्षा ऋतु, ने.सं. :– ११३८, (दिल्लागा), काठमाण्डौ, नेपालमा सूर्योदय : बिहान ०५:३१ बजे...