दशैंका यात्रु बिचौलियाबाट लुटिँदै, सीटबिनै दोब्बर भाडा, ड्राइभरको पछाडि ज्येष्ठ नागरिक

४ कात्तिक,२०७५ काठमाडौं । दशैंको टीका सकिएको भोलिपल्ट शनिबार बिहानै हातमा दुईवटा झोला बोकेर उदयपुरको बेलका नगरपालिकास्थित रामपुर बजारमा उभिएका एक युवा भेटिए । ती युवा काठमाडौको गाडी कुरिरहेका रहेछन् ।

‘मिनी बसको टिकट काटेको छु, खै ५ बजे नै आउँछ भनेको थियो, अहिलेसम्म आएको छैन’- उनले सुनाए । बिहान पाँच बजे नै गाडी आउँछ भनेपछि ४ बजेर ३० मिनेट जाँदा बसपार्कमा पुगेका ती युवाले गाडीको पर्खाइमा डेढ घण्टा बिताए ।

भनेको समयमा गाडी त आएन । तर, टिकट काउण्टरमा अर्का एक युवा आए । उनी सोही काउण्टरको टिकट काट्ने मान्छे रहेछन् । ‘तपाईहरुको टिकट भयो ?’ छेउमा उभिएका सबैलाई हेर्दै उनले सोधे ।

काउण्टरवालातिर हेर्दै अघिका युवाले टिकट दिँदै भने- ‘हजुर दाइ, अस्ति ३ दिन अगाडि नै टिकट काटेको, गाडीचाहिँ कतिबेला आइपुग्छ ?’

उनको प्रश्नको उत्तर दिन भन्दा पहिले काउण्टरवालाले टिकट हेरे र भने- ‘१२ सय तिर्नु भएको रहेछ, यसले पुग्दैन, १ सय थप्नुपर्‍यो ।’

काउण्टरवालाको जवाफपछि ती यात्रु झोक्किए । ‘मैले अस्ति पैसा तिरिसकेको हुँ । फेरि किन थप्ने ?’

‘अस्ति टिकट काटेको पनि फेरि पैसा थप्नुपर्छ !’ काउण्टरवालाले अस्ति मिनिबसका लागि १ हजार २ सयमा टिकट काटेको तर आज मिनिबसको सट्टा ठूलो माइक्रो (जम्बो हायस) जाने भएकाले थप १ सय दिनु पर्छ भनेर सम्झाएपछि उनी एक सय रुपैयाँ थप्न राजी भए । उनले सय रुपैयाँको नोट दिँदै भने- ‘गाडी पर्खेको २ घण्टा हुन लाग्यो, कतिबेला आउँछ त ?’

काउण्टरवाला बोलेनन् । गोजीबाट मोबाइल निकालेर उनले १३ जना मान्छे भइसकेकाले र गाडी पठाउन आग्रह गरे । र, फोन राखेर भने- ‘ल गाडी इटहरीबाट हिँडिसक्यो, एक घण्टामा आइपुग्छ ।’

तर, काउण्टरवालाले एक घण्टा भनेको, दुई घण्टा बितिसक्दा पनि गाडी आएन । यात्रुहरु काउण्टरवालासँग रिसाउँदै खै गाडी भनेर प्रश्न तेर्साइरहेका थिए । काउण्टरवाला दुई शब्दमा यात्रुको उत्तर दिन्थे ‘केहीबेर पर्खनुस् ।’

बिहान ८ बजेर २० मिनेट नाघिसकेपछि गाडी आयो । सबै यात्रुहरु चढे ।

गाडी अगाडि बढ्यो र अलि पर पुगेर रोकियो । त्यहाँ पनि केही यात्रुहरु टिकट काटेर गाडी पर्खिरहेका रहेछन् । ती यात्रुहरु निकै झोक्किए । ड्राइभरले मेरो गल्ती होइन हजुर, तपाईहरुले पैसा तिरेको मान्छेसँग भन्नु भन्दै उनीहरुलाई गाडीमा चढाए ।

रामपुरबाट छुटेको गाडी उदयपुर जिल्ला छाडेर सप्तरी पुग्दासम्म ३ ठाउँमा मान्छे चढे । सिट खचाखच भरिइसकेका थिए ।

सिटका विषयमा लफडा

गाडी सप्तरीको कञ्चनरुप नगरपालिकाको कञ्चनपुर बजारमा पुग्यो । एक अधबंैशे व्यक्तिले गाडी रोक्न इशारा गरे । गाडी रोकियो । ‘यो गाडीमा ५/६ नम्बर सिट खाली गरिदिनुस त, मेरो मान्छे छ’ भन्दै उनी आफंैले गाडीको ढोका खोले ।

गाडीका सबै सिट भरिएका थिए । सबै सिट भरिएको देखे पछि ती व्यक्तिले ५ र ६ नम्बर सिटमा बसेका व्यक्तिलाई त्यो सिट आफूले रामपुरको काउण्टरवालासँग सम्पर्क गरेर काटेको भन्दै छाड्न आग्रह गरे । तर, सिटमा बसेका व्यक्तिले आफूहरुले सिटको पैसा तीन दिन अगाडि नै तिरिसकेको भन्दै छाड्न मानेनन् ।

त्यहीँबाट शुरु भयो सिटको लफडा । ‘राजेशलाई ५ र ६ नम्बरको सिट भनेर झुक्याउने, यो गाडी म जानै दिदिनँ ।’ ती व्यक्ति जंगिए । गाडी नै जान नदिने भनेपछि यात्रुहरुले एकै स्वरमा भने तपाई को हो ? किन हामीलाई सास्ती दिनुहुन्छ ?’

राजेश नाम गरेका ती व्यक्ति कञ्चनपुरका टिकट काट्ने मान्छे रहेछन् । उनले २ वटा सिट छन् भनेर काठमाडौंका लागि टिकट भनेका रहेछन् ।

त्यहाँ निकैबेर भनाभन भयो । राजेशले रामपुरको काउण्टरमा सम्पर्क गरे । तर, फोन लागेन । निकैबेरको भनाभन पछि अन्ततः ड्राइभरले एउटा जुक्ति निकाले ।

ड्राइभरको सिटभन्दा पछाडि र सिट नम्बर १ र २ अगाडि अलिकति खाली ठाउँ थियो । आफ्नो सीट पछाडि भएको खाली ठाउँमा मान्छे राखिदिन र त्यसवापत भाडा रकम घटाएर दिन उनले आग्रह गरे । त्यसो भने पछि राजेशले यात्रु हाल्न राजी भए । ६० वर्ष नाघेका ज्येष्ठ नागरिक यात्रुलाई त्यही अलिकति खाली ठाउँमा बस्न भनियो ।

केहीबेर ती ज्येष्ठ नागरिकहरुले यस्तोमा बसेर काठमाडौं पुग्न नसकिने भन्दै राम्रो सिट मिलाइदिन आग्रह गरिहेरे । तर, यहाँ सिट भरिएको र अर्को गाडी पनि नपाइने भने पछि त्यही ठाउँमा बस्न उनी बाध्य भए । अडि नै नसक्ने साह्रै अप्ठेरो ठाउँमा बस्नुको विकल्प नभएपछि उनीहरुले बाध्यताबस कष्टपूर्ण यात्राका लागि तयार भए ।

बिचौलियाका कारण यात्रुहरु समस्यामा पर्छन् भन्ने कुरा खोज्न अन्त जानु पर्दैन । एक गतिलो उदाहरण यही हो । गाडी अर्कैको, यात्रा गर्ने पनि अर्कै व्यक्ति अनि काउण्टर पनि रामपुर बसपार्कको । अनि बीचमा बसेर पैसा कमाउने चाहिँ राजेश । गाडीले कञ्चनपुर छाडेपछि मात्रै थाहा भयो राजेशले यात्रुलाई ठगेका रहेछन् ।

सापकोटा थरका ती ज्येष्ठ नागरिकहरुसँग राजेशले १ हजार ३ सयका दरले २ हजार ६ सय रुपैयाँ असुलेका रहेछन् । गाडीका चालक स्वयं नै साहु भएकाले कति दियो त पैसा भनेर सोध्दा ठगिएको थाहा भयो ।

आफूले २६ सय लिए पनि ८ सय रुपैयाँका दरले जम्मा १६ सय रुपैयाँमात्रै राजेशले गाडीवालालाई बुझाएका रहेछन् । अर्थात दुईजनाको टिकट काट्दा १ हजार रुपैयाँ राजेशले कमाएछन् ।

टिकट काट्ने बिचौलियाका कारण यतिधेरै यात्रुहरु समस्यामा परिरहेका छन् । बिचौलियाले न उचित भाडा लिए, न त राम्रो सिट नै मिलाइदिए । भाडा महंगो तिरेर यात्रा गर्ने ज्येष्ठ नागरिक त प्रतिनिधि पात्र मात्रै हुन् । यस्ता घटना हरेक गाडीमा हुने गरेका छन्, दशैंका बेलामा ।

हुन त सरकारले महिला, ज्येष्ठ नागरिक र अपाङ्गहरुलाई प्रत्योक गाडीमा आरक्षण सीटको अनिवार्य व्यवस्था गर्नुपर्ने भनेको छ । तर, देशमा दुई तिहाईको सरकार भएर पनि सरकारै नभएजस्तो भएपछि ज्येष्ठ नागरिकहरुले समेत सास्ती ब्यहोर्ने पर्ने भएको छ ।

यसरी ठगिँदैछन् यात्रु

शनिबार उदयपुरको रामपुर, सप्तरीको फत्तेपुर, कञ्चनपुर लगायतका ठाउँहरुमा यस्तो देखियो, जहाँ टिकट काट्नेले जे गरे पनि यात्रुहरु चुपचाप सहन बाध्य थिए । उनीहरु जति भाडा भने पनि चुपचाप तिर्न बाध्य थिए ।

नेपालमा बिरलैमात्र यस्ता क्षेत्र होलान्, जहाँ बिचौलिया छैनन् । यातायात व्यवसायमा भएको सिण्डिकेटको बहस लामै समय चल्यो । तर, दशैंका बेलामा यातायात क्षेत्रका बिचौलियाको मनपरि यस वर्ष पनि प्रसस्तै देखियो ।

विजयादशमी सकिएसँगै काठमाडौं फर्किने सर्वसाधारणले यतिबेला सिण्डिकेटको सास्ती व्यहोरिरहेका छन् । दशैं मनाउनका लागि कर्मथलो छाडेर जन्मथलोतिर लागेका सर्वसाधारणहरु पुनः कर्मथलोमा फर्किन धेरैले स्थलमार्ग प्रयोग गरिरहेका छन् ।

काठमाडौंबाट गाउँ जानका लागि सर्वसाधारणले जति सास्ती खेपे, त्योभन्दा धेरै सास्ती काठमाडौं र्फकंदा खेप्नुपरेको छ । काठमाडौं छाड्दा बढी भाडा तिर्नु नपर्ने र कसैले बढी भाडा लिए ठाउँको ठाउँ कारबाही गर्ने प्रहरीको उर्दीपछि धेरै यात्रुहरु ठगिनबाट जोगिए । तर, तिनै यात्रुहरु काठमाडौं र्फकनका लागि भने जति भाडा भन्यो, उति नै तिर्न बाध्य छन् ।

प्रहरी नै बेखबर !

दशैं मानेर काठमाडौं फर्किने यात्रुहरुलाई कुनै पनि समस्या नरहेको इलाका प्रहरी कार्यालय रामपुरका प्रमुख, प्रहरी निरीक्षक नविन सिंह बताउँछन् । गाडीहरुले भाडा तोकिए अनुसारको नै लिएको प्रहरी निरीक्षक सिंहको दाबी छ ।

यात्रुलाई कुनै त्यस्तो समस्या नरहेको र रामपुरदेखि काठमाडौंसम्मा जाने भाडा ७ सय देखि १ हजार रुपैयाँसम्म रहेको उनी बताउँछन् । प्रहरी निरीक्षक सिंहकै भनाइलाई आधार मान्दा गाडीवालाले प्रतिव्यक्ति ३ सय रुपैयाँदेखि ६ सय रुपैयाँसम्म बढी भाडा असुलिरहेका छ । तर, प्रहरी चुपचाप बसेर भन्छ- ‘यात्रुहरुलाई कुनै समस्या छैन ।

यसमा तपाइको मत

समाचार बाट अन्य

सिस्नु हानाहान गरी सङ्क्रान्ति मनाउँदै

१ माघ, जाजरकोट । परापूर्वकालदेखि जाजरकोटका गाउँगाउँमा सिस्नु हानाहान गरी माघे सङ्क्रान्ति मनाउने कार्य शुरु भएको छ । चेली, बुहारीले टाढाटाढाबाट माइती घरमा गएर मिठो, मसिनो खाने चलनसमेत रहेको छ । मङ्गलबार बिहानैदेखि जिल्लाको पूर्वी...

निर्मला हत्यामा आधारित बन्यो चलचित्र ‘कोपिला’

काठमाण्डु। बलात्कारपछि हत्या भएकी कञ्चनपुरकी १३ वर्षीय बालिका निर्मला पन्तको घटना अब फिल्मको पर्दामा देख्न पाइने भएको छ । शिवम् अधिकारीको निर्देशनमा फिल्म बनेको हो । सोमबार भरतपुरमा एक कार्यक्रम गर्दै फिल्मको ईन्डक्ल्याप गरिएको छ...

विवेकशील साझा र नयाँ शक्तिबीच एकता हुनसक्ने सम्भावना

काठमाण्डौ – विवेकशील साझा पार्टीका प्रवक्ता डा.सूर्यराज आचार्यले विवेकशील नेपाली दलसँग गरिएको पार्टी एकता नै भावनात्मक हुन नसक्दा फुटको नियति भोग्नु परेको बताउनु भएको छ । पार्टीको केन्द्रीय समितिको बैठकपछि आयोजित पत्रकार सम्मेलनमा उहाँले यस्तो...

१३ वर्षीया बालिका बलात्कार पछि हत्या गर्ने दम्पतीलाई जन्मकैदको फैसला

सुनसरी :धरानकी अनुसा राई हत्या प्रकरणमा जिल्ला अदालत सुनसरीले २ जनाविरुद्ध जन्म कैदको फैसला सुनाएको छ । १३ वर्षीया बालिका राईको बलात्कार पछि हत्या अभियोगमा धरान–१६ का वलिमान राई र उनकी श्रीमती पदमकु मारी राईविरुद्ध...

प्रभाससँग भएका पाँच सर्वाधिक महँगा बस्तुहरू,जीमखानकै डेढ करोड भारू !

तेलेगु सुपरस्टार प्रभासले सन् २००० मा ‘एश्वर’ सिनेमाबाट डेब्यू गर्दै आफ्नो सिनेमा यात्रा सुरू गरेका थिए। सन् २०१५ मा रिलिज भएको ‘बाहुबली’ सिनेमाले उनलाई भारतभर र भारतीय सिनेमाका पारखी दर्शकहरूमाझ बृहत चर्चा दिलायो। आज यी...

कोमल वलीका नाममा नेकपाभित्र लफडा !

१ माघ, काठमाडौं । पार्टी अध्यक्ष तथा प्रधानमन्त्री केपी शर्मा ओली पक्ष प्रदेश कमिटीहरु गठनको निर्णय संशोधन गर्न तयार नभएपछि नेकपा स्थायी कमिटीले बनाएको कार्यदल अवरुद्ध अवस्थामा पुगेको छ । शुरुदेखि नै काम गर्न...

पत्रकारको हत्यामा दोषी ठहरिए राम रहीम

दुई महिला बलात्कार मुद्दामा २० वर्ष जेल सजाय पाएका डेरा सच्चा सौदा प्रमुख राम रहीम पत्रकार रामचन्द्र छत्रपतिको हत्यामा दोषी ठहरिएका छन्। भारत चुकुलाको विशेष सिबिआइ अदालतले रहीमका साथै कुलदीप सिंह, निर्मल सिंह र कृष्णलाललाई...

दुई अस्पताल खारेजीको तयारी, आन्दोलन गर्ने कांग्रेको चेतावनी

काठमाडौं : कांग्रेस वरिष्ठ नेता रामचन्द्र पौडेलले पार्टीका पूर्वसभापतिको नाममा स्थापित अस्पताललाई सरकारले विघटन गर्न खोजेको आरोप लगाएका छन् । पूर्वप्रधानमन्त्रीसमेत रहेका कांग्रेसका पूर्वसभापति गिरिजाप्रसाद कोइराला र सुशील कोइरालाको नाममा स्थापना गरिएको अस्पताललाई सरकारले विघटन...

स्मार्ट लाइसेन्सको प्रिन्ट गुणस्तरीय नभएको निश्कर्ष

१ माघ, काठमाडौं । यातायात व्यवस्था विभागले आउटसोर्सिङ गरेर छापिएको स्मार्ट लाइसेन्स गुणस्तरीय नभएको निश्कर्ष निकालेको छ । त्यसैका अधारमा तत्कालका लागि आउटसोर्सिङ कम्पनी मालिका इन्कर्पोरेटमार्फत हुने छपाइ रोकिएको छ । कम्पनीले करिब ४ लाख...

मलाइका र अर्जुनको ‘अफेयर’ले सलमानलाई किन टाउको दुखाइ ?

नयाँदिल्ली : अभिनेत्री मलाइका अरोरा र अर्जुन कपुरको ‘अफेयर’ले यतिबेला बलिउड बजार तातेको छ । दुबैजना केही समययता डिनर, पार्टी लगायत सार्वजनिक कार्यक्रममा संगै देखिँदैआएका छन् । अर्का अभिनेता सलमान खानलाई भने उनीहरुको निकटता चित्त...