समाचार
आइतवार, माघ ५ २०७६

म सिक्किममा छु, प्रहरीलाई सहयोग गर्न तयार छु’-आस्था राउत

1.2K

५ माघ काठमाडौँ गायिका आस्था राउतलाई पक्राउ गर्न प्रहरीले अनुमती पाइसकेको छ । विमानस्थलमा भएको महिला सुरक्षाकर्मी र आस्था राउतको विवादपछि उनले फेसबुक लाइभ मार्फत प्रहरी संगठनमाथि नै आक्रोश पोखेकी थिइन् । उनको आक्रोशमा प्रहरी संगठनमाथि गालीगलौज पनि गरिएको थियो । यसपछि, आस्थाले फेसबुक लाइभ मार्फत माफी पनि मागिसकेकी छिन् ।

प्रहरीले आस्था राउतलाई पक्राउ गर्ने अनुमती पाएको तर उनी फरार रहेकाले खोजी जारी रहेको बताएको छ । गायिका आस्था राउत भने अहिले सिक्किममा छिन् ।

सिक्किमबाट अनलाइनखबरको सम्पर्कमा आएकी गायिकाले भनिन्–‘फरार रहेको भन्ने बिषयमा म केही भन्न सक्ने अवस्थामा छैन । किनकी, अहिले म सिक्किममा छु र आज यहाँ शो भएकाले यसको तयारीमा छु ।

मलाई प्रहरीबाट यो बिषयमा कुनै पनि आधिकारिक जानकारी आएको छैन । मलाई प्रहरीले यस बिषयमा जानकारी गराएपछि म प्रहरीलाई सहयोग गर्न तयार छु । म अहिले यही शोको तयारीमा छु ।’

आस्थाले आफूमाथि दुर्व्यवहार भएको पनि बताएकी छिन् । उनले भनिन्–‘म माथि सुरक्षा जाँचका क्रममा दुर्व्यवहार भएको हो । तर, मैले आवेगमा आएर केही शब्दहरु गलत बोलेकी हुँ । यसका लागि म क्षमा माग्न चाहन्छु ।’