काठमाडौं– केही साता अघि मात्र दक्षिण भारतीय फिल्म ‘अर्जुन रेड्डी’ को नेपाल रिमेकका लागि अडिसन शुरु हुने खबर सार्वजनिक भएसँगै केही कलाकारहरुले आफ्नो लुक्स फिल्मको लागि उपयुक्र्त भएको भन्दै तस्वीर राखे । अभिनेता आर्यन सिग्देलदेखि सम्पादक साहिल खानसम्मले तस्वीर सामाजिक सञ्जालमा राखे ।

झण्डै आधा दर्जन फिल्ममा अभिनय गरिसकेका अभिनेता शेखर सुवेदी यो फिल्मका लागि अडिसन दिने तयारीमा छन् ।

‘अर्जुन रेड्डीको अडिसनका लागि कलाकारलाई तोकिएको उमेरलगायतको मापदण्ड अनुसार म फिट छु । फिल्मको जस्तै मेरो लुक्स, उमेर र अभिनय पनि मिल्छ’, उनको दाबी छ ।

अभिनयमा डिप्लोमा कोर्ष गरेका शेखरले ‘गाजाबाजा’, ‘निर्भय’, ‘चीँ मुसी चीँ’लगायतका फिल्ममा अभिनय गरिसकेका छन् । उनले झण्डै एक दर्जनको हाराहारीमा म्यूजिक भिडियोमा पनि अभिनय गरेका छन् ।

आशिष श्रेष्ठ र केशव खड्काले निर्माण गर्ने ‘अर्जुन रेड्डी’को नेपाली रिमेकमा विशाल सापकोटाको निर्देशन हुनेछ ।