काठमाडौँ । काठमाडौँमा आयोजित एउटा विवाहमा दुलाहा नै नआएपछि प्रहरीमा उजुरी परेको छ । काठमाडौँको बानेश्वरमा आयोजित विवाह कार्यक्रममा निर्धािरित समयसम्म जन्ती नआएपछि दुलही पक्षले प्रहरीमा उजुरी गरेको हाे । सिनामंगल घर बताउने आश्रेय बस्नेतले आफू इन्जिनियर भएको बताएको र बुवा डाक्टर रहेको बताएका थिए । १५ दिनअघिमात्रै उनीहरूको टीकाटालो भएको थियो । टीकाटालोमा केटी पक्षले केटा पक्षलाई चार तोला सुन समेत दिएको थियो । उजुरीपश्चात बस्नेत बस्ने भनिएको घर पुग्दा उनी त्यही घरमा डेरामा बस्ने गरेको तथ्य खुलेको छ । कोठामा ताला लागेको अवस्थामा प्रहरी उक्त घरमा पुगेको थियो । केटापक्षले हजुरआमा भनेर चिनाएकी मान्छे अहिलेसम्म फेला नपरेको बताइएको छ । कार्डमा उल्लेख गरिएको केटाको बाबु–आमाको नामसमेत नक्कली रहेको बताइएको छ । काठमाडौँबाट एकाएक गायब भएका दुलाहा भने पोखरा विमानस्थलमा भेटिएका छन् । प्रहरी उनको साथबाट ४ हजार डलर समेत फेला पारेको बताइएको छ । काठमाडौँ प्रहरी परिसरका डिएसपी होविन्द्र बोगटीका अनुसार उनको वास्तविक नाम समेत साहिल बस्नेत रहेको छ ।