काठमाडौँ । प्रधानमन्त्री केपी शर्मा ओलीले साँझबिहानै भात खाने प्रचलनले भारतबाट वर्षेनी ठूलो मात्रामा धान आयात भइरहेको बताएका छन् ।

१७ औँ राष्ट्रिय धान दिवस तथा रोपाईँ महोत्सवका अवसरमा सन्देश जारी गर्दै प्रधानमन्त्री ओलीले नेपालीहरूको जीवनशैलीले आयात बढ्दै गएको बताएका हुन् ।

‘पछिल्ला केही वर्षहरुमा जनसंख्या बृद्धिको साथै जनताको आर्थिक अवस्थामा सुधार आई दुबै छाक भात खाने प्रचलन र मसिनो चामलको उपभोगमा भएको वृद्धिले समेत धान चामलको मागमा तीब्र बृद्धि हुँदै आएको छ’, प्रधानमन्त्री ओलीले भने, ‘माग अनुसारको आन्तरिक उत्पादन नहुँदा वर्षेनी ठूलो धनराशी धान चामल आयातमा खर्चिनु परेको छ ।’

प्रधानमन्त्री ओलीले सरकारले प्रमुख खाद्यान्न बालीका रूपमा रहेको धानको उत्पादन वृद्धि गरेर दीगो खाद्य सुरक्षा कायम गर्ने विषयलाई उच्च प्राथमिकतामा राखेर नीति तथा योजना तर्जुमा कार्यान्वयनमा ल्याएको उल्लेख गरेका छन् ।