काठमाडौँ : नेकपा माओवादी केन्द्रका अध्यक्ष पुष्पकमल दाहालले आज राजनीतिक दलका नेताहरुसँग गम्भीर वार्ता हुने बताएका छन् । चितवनको माडीमा नगरपालिकास्तरीय वाइसीएल भेलालाई सम्बोधन गर्दै अध्यक्ष दाहालले देशको राजनीतिक अवस्था असहजतर्फ अघि बढेको भन्दै उनले त्यसलाई परास्त पार्न दलका नेताहरुसँग वार्ता हुन लागेको बताए । 

‘देशको राजनीतिक असहज र अस्वभाविक ढंगले अघि बढेको छ । संघीय गणतनन्त्रमाथि हमला गर्ने प्रयास भएको छ । विभिन्न प्रतिक्रियावादी केन्द्रहरु  दुष्साहस गरिरहेका छन्,’  दाहालले भने । 

उनले आफू अहिले केपी ओली नेतृत्वको सरकार ढाल्न प्रयास गरिरहेको पनि बताए । ‘अब एकछिन पछि म काठमाडौँ फर्किएर दलका नेताहरुसँग छलफल गर्दैछु,’ उनले भने, ‘अलोकतान्त्रिक सरकारलाई ठेगान लगाउने अन्तिम तयारी गर्दैछु । कर्णालीमा के गर्याैँ हामीले देखिहाल्यौँ । गण्डकीमा, लुम्बिनीमा के हालत हुँदैछ देखिएकै छ ।केन्द्रमा नै के हुन्छ केही दिनमा थाहा भइहाल्छ ।’ उनले केपी ओली नेतृत्वको सरकार पतन भएपछि नयाँ युग सुरु हुने दाबी गरे ।