काठमाडौं । कोरोना संक्रमणको जोखिम बढ्दै गएपछि सरकारले वैशाख मसान्तसम्म सिनेमा हल बन्द गर्ने निर्णय गरेको छ । आज (सोमबार) विहान बसेको मन्त्रिपरिषद् बैठकले सिनेमा हलसहित भिडभाड हुने सम्पूर्ण क्षेत्र बन्द गर्ने निर्णय गरेको हो । 

१० महिना बन्द भएर पुस २६ गतेदेखि ५० प्रतिशत अकुपेन्सीमा सञ्चालनमा आएका हल पुन बन्द भएका हुन् । पुस २६ यता चारवटा नेपाली चलचित्र रिलिज भए पनि ती चलचित्रले दर्शक तान्न सकेका थिएनन् । ठूलो ब्यानरले चलचित्र रिलिज नगर्दा र बलिउडबाट प्रतिक्षित चलचित्र नआउँदा दर्शक हल गएका थिएनन् । 

ठूलो ब्यानरका नयाँ चलचित्र लगाउँदा दर्शक हलसम्म आउँछन् अथवा आउँदैनन् भन्ने निश्चित नहुँदा ठूलो लगानीमा निर्माण भएका चलचित्र रिलिज नै भएका थिएनन् । 

सरकारले लगानी सुरक्षित गर्ने आकर्षक कार्ययोजना तथा सहयोग नल्याएको भन्दै निर्माताहरु करोडौं रुपैयाँ जोखिम मोल्न नसकिनेभन्दै हल रिलिजमा गएका थिएनन् ।