काठमाडौँ – जनता समाजवादी पार्टी (जसपा)को कार्यकारिणी समिति बैठक जारी छ । पार्टीका तर्फबाट सरकारमा पठाउने मन्त्रीबारे छलफल गर्न जारी बैठकमा अहिलेसम्म कुनै सहमति नभएको बैठकमा सहभागी एक नेताले जानकारी दिए ।

‘सरकारमा सहभागिता र मन्त्री चयनका विषयमा छलफल केन्द्रित छ । अहिलेसम्म व्यक्ति र मन्त्रालयको कुरा टुंगिएको छैन,’ ती नेताले भने ।

सत्ता गठबन्धनसँग कति र कुन कुन मन्त्रालय भन्ने नटुंगिएकाले अहिले व्यक्ति र मन्त्रालयबारे निर्णय हुन सक्ने सम्भावना नरहेको ती नेताले बताए । वर्तमान सत्ता गठबन्धनमा नेपाली कांग्रेस, माओवादी, जसपा, एमालेको वरिष्ठ नेता माधवकुमार नेपाल समूह र राष्ट्रिय जनमोर्चा छन् ।

मन्त्री कुन दललाई कती र मन्त्रालय टुंग्याउन सत्ता गठबन्धनका शीर्ष नेताहरूको बैठक साँझ पुनः बस्ने सम्भावना रहेको बालुवाटार स्रोतले जानकारी दियो । गठबन्धनले शीर्ष नेतालाई मन्त्री र मन्त्रालय टुंग्याउने जिम्मेवारी दिएको छ । भने जसपाले अध्यक्ष उपेन्द्र यादव, संघीय परिषद् अध्यक्ष तथा पूर्वप्रधानमन्त्री डा.बाबुराम भट्टराई र वरिष्ठ नेता अशोक राईले मन्त्री छान्ने जिम्मेवारी दिएको छ ।