काठमाडौँ । लकडाउनमा जुवा खेलिरहेको अवस्थामा पक्राउ परेका ९ जना भिआइपी जुवाडे धरौटीमा छुटेका छन् । काठमाडौंका प्रमुख जिल्ला अधिकारी जनकराज दाहालका अनुसार १ जनालाई ४० हजार र बाँकीलाई जनही ३० हजार धरौटीमा छाड्ने आदेश दिएको थियो ।

उनीहरुले सो धरौटी बुझाएर शुक्रबार रिहा भएको महानगरीय प्रहरी बृत्त दरबारमार्गले जानकारी दिए । ४० हजार धरौती बुझाउनेमा व्यापसायी अशोककुमार अग्रवाल रहेको छ । रिहा हुनेमा अग्रवालसहित नन्द किशोर शर्मा, गोविन्दराम सरिया, बिमलकुमार खेतान, राम चन्द्र सांघाइ, पुरूषोत्तम अग्रवाल, विमल अहुजा, सुरेश अग्रवाल र होटलका सञ्चालक भारतका मिक्की जोगाइ रहेका छन् ।

गत सोमबार राति पक्रउ परेका उनीहरुलाई जिल्ला प्रशासन कार्यालयले ५ दिन हिरासतमा राखेर अनुसन्धान गर्न अनुमति दिएका थियो । अनुसन्धान सकेर उनीहरूलाई आज सिडीओ कार्यालयमा उपस्थित गराइएकाले धरौटीमा छाड्ने आदेश भएको हो ।

सोमबार राति काठमाडौंस्थित कमलादीको एक होटलबाट जुवा खेलिरहेको अवस्थामा उनीहरूलाई महानगरीय प्रहरी वृत दरबारमार्गले पक्राउ गरेको थियो । उनीहरूको साथबाट दुई लाख ७७ हजार सात सय २० रूपैयाँ नगद बरामद गरिएको थियो ।