काठमाडौँ । युरोपियन विमान कम्पनी एअर बसमा एक हजार ६ सय रोजगारीका अवसर कटौतीको विषयलाई लिएर बिहीबार स्पेनमा कर्मचारीहरूले प्रदर्शन गरेका छन् । यद्यपि सयौं रोजगारी कटौती गर्ने घोषणा महामारी सुरू भएपछि फेब्रुअरीमा पहिलो पटक गरिएको थियो ।

कोरोना भाइरस महामारीले कम्पनी निकै प्रभावित बनेपछि जुनको अन्त्यमा घटाउने पदहरूको सङ्ख्या दोब्बर हुने घोषणा गरिएको छ । स्पेनको राजधानी म्याड्रिडको दक्षिणी क्षेत्रमा रहेको गेटाफेमा मास्क लगाएका सयौँ प्रदर्शनकारीहरूले विमानको कार्यालय र स्थानीय शहरको हलको मध्य क्षेत्रमा प्रदर्शन गरेका थिए ।

उनीहरूले कसैले जागिर नछोड्ने पद खारेज गर्न नपाइने भावका नारा लेखिएका ब्यानरसहित जुलुसमा सहभागी बनेका थिए । जुनको अन्त्यमा एअर बसले विश्वभर आफ्ना १५ हजार कर्मचारीलाई कटौती गर्ने योजना बनाइरहेको बताएको थियो । जसमा स्पेनमा ८ सय ८९ कर्मचारी हटाउने एअर बसले जनाएको छ ।

“मलाई थाहा छ यो गाह्रो अवस्था हो तर एअर बस जस्ता प्रसिद्ध कम्पनीबाट कर्मचारीमाथि यस किसिमको निर्मम निर्णय आउँछ भन्ने मलाई लागेको थिएन,” एक एअरबसका ३६ वर्षीय इञ्जिनियर जेभियर पयाले भने ।

एअर बसले स्पेनभरि करिब १२ हजार ३ सय जनालाई रोजगार प्रदान गरेको छ । तर युनियनका प्रतिनिधिहरूले प्रत्यक्ष तथ अप्रत्यक्ष रूपमा एक लाख व्यक्तिलाई रोजगारी दिएको दाबी गरेका छन् ।

एअर बसका प्रवक्ताले २ जुलाईदेखि युनियनसँग वार्ता सुरु भएको र समाधानहरू खोज्ने पहल भइरहेको तथा महामारीबाट थला परेको उद्योगलाई जोगाउँदै न्यूनतम रोजगारी कटौतीका लागि सहमति निकाल्ने बताए । एजेन्सी