काठमाडौँ । पूर्वप्रधानमन्त्री तथा नवगठित डा. बाबुराम भट्टराईले अपराधीलाई संरक्षण गर्ने प्रधानन्यायाधीशमाथि महाअभियोग लगाउन प्रस्ताव गरेका छन् । उनले प्रधानमन्त्री केपी ओलीलाई विदा गरेर नेकपाभित्रैबाट अर्को व्यक्तिलाई प्रधानमन्त्री चयन गर्न सुझाएका छन् ।

सर्वोच्च अदालतले जेल सजाय कटौती गरिदिएपछि पूर्वडीआईजी रञ्जन कोइराला रिहा भएको भोलिपल्टै डा. भट्टराईले न्यायाधीशमाथि महाअभियोग लगाउन प्रस्ताव गरेका हुन् ।

समाजवादी पार्टीका अध्यक्षसमेत रहेका डा. भट्टराईले देश गम्भीर संकटतिर जान लागेको बताउँदै आफ्ना धारणा बुँदागत रुपमा ट्वीटरमार्फत् सार्वजनिक गरेका हुन् ।

‘लोकतान्त्रिक ढंगले संकटमोचन गर्ने उपाय’ भन्दै डा. भट्टराईले संसद अधिवेशन बोलाउन, केपी ओलीलाई विदा गरेर नेकपाभित्रैबाट नयाँ प्रधानमन्त्री चयन गर्न र अपराधको संरक्षण गर्ने न्यायाधीशलाई महाअभियोग लगाउन प्रस्ताव गरेका छन् ।

साथै उनले भ्रष्टाचार रोक्न शक्तिशाली लोकपाल गठन गर्न र प्रत्यक्ष निर्वाचित कार्यकारी राष्ट्रपतिमा जान पनि प्रस्ताव गरेका छन् ।