काठमाडौँ। कोरोना भाइरस नियन्त्रण तथा रोकथामका लागि विज्ञहरूबाट आएका सुझाव कार्यान्वयन गर्ने प्रतिबद्धता प्रधानमन्त्री केपी शर्मा ओलीले गरेका छन्।

मंगलबार सरोकारवाला र विज्ञहरूलाई बालुवाटारमा बोलाएर सुझाव लिएका प्रधानमन्त्री ओलीले प्राप्त सुझाव कार्यान्वयनमा लैजान आफू प्रतिवद्ध रहेको बताएका हुन्।

प्रम ओलीले स्वास्थ्य क्षेत्र, राजनीतिक क्षेत्र र आर्थिक क्षेत्रका विज्ञहरुसँग परामर्श गरेका हुन्। उक्त परामर्शमा २५ जनाको उपस्थिति रहेको थियो।

‘परामर्शमा प्रमुख प्रतिपक्ष दलका काँग्रेस सभापति शेरबहादुर देउवा र जनता समाजवादीका अध्यक्ष महन्थ ठाकुर र राष्ट्रिय योजना आयोगका उपाध्यक्षसहित २५ जनाको उपस्थिति रहेको थियो’, प्रधानमन्त्रीका प्रेस सल्लाहकार थापाले भने, ‘सुझाव दिनेहरुलाई प्रधानमन्त्रीले धन्यवाद दिनुभयो र कार्यान्वयनमा लैजाने प्रतिवद्धता जनाउनुभयो।’

थापाले सुझावहरु एकै खालका नभएको भन्दै समग्रतामा कोभिड समस्या बढिरहेको सन्दर्भमा मिश्रित सुझाव प्राप्त भएको बताए।