काठमाडौँ । ८ महिनादेखि होटेलमा बसिरहेका दाङ घर भएका कृष्णबहादुर बोहरालाई हत्याअघि पाँचवटा स्लिपिङ ट्यावलेट खुवाइएको खुलेको छ।

अभियुक्त कल्पना मुडभरीले प्रहरीलाई दिएको बयानअनुसार बोहरालाई दहीमा हालेर ट्याबलेट खुवाइएको थियो। काठमाडौं प्रहरी प्रमुख एसएसपी श्याम ज्ञवालीले मंगलबार आयोजित पत्रकार सम्मेलनमा दिएको जानकारीअनुसार बोहोरा लठ्ठिएपछि कल्पनाले अण्डकोषमा हम्मरले प्रहार गरेकी थिइन्। लट्ठिएका बोहरालाई सलको पासोले कसेर हत्या गरेको मुडभरीले बताइन्। बोहोरा मरेको एकिन गरेपछि शवको व्यवस्थापनका लागि घाँटी र खुट्टा छिनालेर आफैंले शव व्यवस्थापन गरेको प्रहरीले जनाएको छ।

सोमबार बिहान काठमाडौंको गोंगबुमा सुटकेसभित्र टाउको र खुट्टाविनाको शव भेटिएको थियो। त्यसको केही मिटर पर जेब्रा झोलाभित्र टाउको र खुट्टा फेला परेको थियो।

अनुसन्धान गर्ने क्रममा प्रहरीले सोमबार नै हत्यामा संलग्न महिला र उनकी छोरीलाई चितवनको टाँडीबाट पक्राउ गरेर काठमाडौँ ल्याएको थियो।