काठमाडौं । नेकपाको आधिकारिकता विवाद चलिरहेका बेला निर्वाचन आयोगका कर्मचारीको सरुवा भएको छ ।

आयोगको कानुन तथा राजनीतिक दलसम्बन्धी महाशाखाका प्रमुख लक्ष्मीप्रसाद गौतमको सरुवा भएको हो  । उनको नेपाल कानुन आयोगमा सरुवा भएको निर्वाचन आयोगका एक कर्मचारीले पुष्टि गरे ।

नेकपाको ओली र प्रचण्ड–नेपाल समूहमध्ये बहुमत जसको छ, उसैको पक्षमा निर्णय हुनुपर्छ भन्ने पक्षमा रहेका गौतमको सरुवा भएको स्रोतको दाबी छ । उनले नै नेकपाको विवाद हेरिरहेका थिए । नेकपाको विवाद प्रभावित पार्न उनको सरुवा भएको स्रोतको जिकिर छ ।

यसैबीच, नेकपाका स्थायी कमिटी सदस्य योगेश भट्टराईले आधिकारिकता विवाद चलिरहेका बेला आयोगका वरिष्ठ कर्मचारीको सरुवाले षड्यन्त्रको आवास भएको भन्दै ट्वीटसमेत गरेका छन् ।

“निर्वाचन आयोगमा नेकपाको आधिकारिकता सम्बन्धित बहस चलिरहेको अवस्थामा आयोगका वरिस्ठ कर्मचारीको सरुवा गरिएको बुझिएको छ । नियतमाथि शंका, षड्यन्त्रको आभास,’’ उनले ट्वीटमा भनेका छन् ।

निर्वाचन आयोगले दुवै पक्षलाई ७ दिनभित्र आधिकारिकता दाबी गर्न पत्र पठाएको छ । दुवै पक्षले आफ्नो पक्षमा बहुमत रहेको बताए पनि कानुनीरुपमा आधिकारिकता दाबी नगरेको आयोगका पदाधिकारी बताउँछन् ।